سنة جايه/ بقلم م محمد بدوى ابو العلا

سنه جايه
*********
سنه جديده جايه تتمخطر
بتمد الخطى ب توب أخضر
نتمنى فيها السرور والستر
ونحقق الحلم اللى داب م الجر

سنه جايه بالورود تتعطر
وتجرى بسرعة الرياح والقطر
تخيط توب من نسيج الصبر
وننسى الحلم اللى عدى ومر

شجره بكر لسه جايه ف عزها
جايه تضلل وتمد لينا فرعها
ومن غير آوان كل المهم عندها
تطرح ثمر يكفى البشر من فرعها

صبيه جايه تتباهى ف بنات جيلها
بفستانها الأبيض والتُل على جبينها
مكتوب كتابها مش سايعاها دنيتها
بتدعى البشر يفرحوا في زفتها

جايه ماسكه ف ايدها الورود
ومرسومه بسمه ع الخدود
بتوزع على الناس العهود
تملا الحياه أمل وورود

سنه لسه جايه من بعيد
جايه بتحسب كام يوم وليد
لسه ف ظلام الرحم عنيد
ولسه ما شقش يوم جديد

جايه بتسأل ع الشروق
والشمس لسه ف سماها فوق
والدم بيجرى في العروق
لسنه جديده مليانه شوق

جايه تسأل مين عنده حلم
تحققه ويبقى علم
أو حلم وجرحه كبير مالم
أو حس من السنين بظلم

سنه ماشيه بالأنين والصبر
وسنه جايه للكسور بالجبر
تجبر أي قلب اتكسر
م العمر اللي عدى ومر

م/ محمد بدوى أبوالعلا