السبولة/بقلم مجدوب الرمى

السبولة....

قولي لينا يا السبولة
فين غاب عليك المطر
خلاك تبكي كيف المهبولة
واخا صبرتي ما نفعك صبر
عند الطير ما بقيتي مقبولة
نشفتي و خسرتي فلمنظر
في عيون العشاق وليتي مذلولة
ذبلتي و عليك لكلام كثر
في فدان ليام وليتي معزولة
جازاوك حبابك باللوم و لغدر
نساو ملي كنتي بيهم مشغولة
اليوم يا ختي زاد همك و كبر
يا حسرة عليك يا السبولة
خسر لونك بهات ولا صفر
صحتك طاحت وليتي معلولة
كلشي هرب منك و جفر
عند الناس ما بقيتيش مقبولة
سومك طاح و حالك خسر
نتي لي كنتي بزينك مدهولة
هذا حال لي بالزين تغرر
ما درتيش حسابك يا لمهبولة
نسيتي بلي الزمان كا يغدر
 
 .. .. 
بقلمي : مجدوب الرمى

Le 12/04/2020