الحرف
======
لو حرفك فى الشعر فصيح
راح يصمد فى مهب الريح
إحساسك بالحرف غناوى
يغزل م التباريح تفاريح
حرفك يعلا ويعلا ويعلا
لو سامق وبدون تجربح
أما الفصحى لازم تصحى
غربل حرفك فى التنقيح
نوع حرفك وأرسم صورك
بكنايه وبدون تصريح
وجناس ويا طباق رقصهم
ركبهم كل المراجيح
خلى القافية تكون معزوفة
تعزف لحن موسيقى مريح
الأشعار مش كلمه وقافيه
الأشعار ملقط تشريح
يشرط فى الأوجاع ويزيلها
يكتب للأوهام تسريح
الشعر لسان حال الأمه
بيهد عروش ظلم يزيح
الشعر الغزلى آه منه
سناره بتصطاد تماسيح
الشعر دا أحلام ورديه
ملضومه فى عقود تسبيح
الشعر حكاوى وغناوى
وابتهالات ويا التواشيح
أما الشعرا ياعينى عليهم
مركبهم م الفقر تطيح
جوه سجون الكلمه الحره
جلد وسحل مع التلقيح
=========
بقلمى سامح توكل ابوالسبح
ليست هناك تعليقات:
إرسال تعليق