الى ‏ستي ‏/بقلم ‏عمار ‏الحريري

شكراً لكم لقبولي بين هاماتكم  ونبضات اقلامكم .. 

رسالة إلى الراحلة ستي في سورية

إلى ستي ...

شو أحكيلك ياستي ..

وشو أشكيلك بعد مارحتي

السنين اتغيرت

والنفوس اتغيرت

الربيع صارلوا عشر سنين

وماعاد اجى صيف

والفصول دايرة

ولسى منترجى لكن ياحيف

الاوضاع ياستي بعدها مثل ماهّية

ألهم المناصب والكراسي 

وألنا بردات الشتوية ..

ألنا المصايب والمآسي    

وألهم طلتهم البهيّة ..

إذا سألوكِ ياستي خبريهم 

أنو تعبنا ،،

والامل مثل طير بالسما وطار ...

وأنو الوضع

مثل النعش 

ناقصوا بعدألف مسمار

مسمار ..

واحنا ياستي

مثل مااحنا 

بين سنديان العروبة  

ومطرقة الغربي 

يلي علينا حاكم صار ..

شو أشكيلك .. ؟

يمكن بكرا ياستي ويمكن لا  

ويمكن بعد بكرا نخلص

قبل ماتخلص الحياة

يمكن الحلم يرجع 

بس الحلم ياستي 

راح يضل حلم 

والآه راح تبقى آه

ياستي لاتنهمي ..

استريحي ونامي

من قبلك 

نامت أمتنا العربية

لكن بتمنى ازورك بمنامي

واسقي الزنبق على قبرك 

والحبق والوردات الجوريّة

واقرأ الفاتحة على روحك

ولأوطاني أقرأ

مثل ماقال الشاعر 

في يدينا بقيَّةٌ من بلادٍ

فاستريحوا كي لا تضيع البقيَّةْ

كلمات عمار الحريري