مراكش يا مدينة الفن
(زجل مغربي)
مراكش البهجة يا مدينة النخيل.
يا أصل لفراجة والفن الرزين.
فيك تجمعو من زمان ملوك الحلقة.
وبيهم تحلى الگلسة والنزاهة.
من طقطقات ودقايقية مع البندير.
وگناوة بنغمة الهجهوج والسنتير.
وعيساوة بالغيطة والإيقاع الرزين.
تلقى عبدات الرمى بشطيحهم يتجادبو.
وشخات زيان يا عاشق الزين.
تحلى لقسارة مع العساوي بلفاعو.
ومرود لقرود تفهى فيه وتراقبو.
يا زاير مراكش فكل يوم نزاهة.
فساحة جامع لفنا ديما كاينة لفراجة.
ومول المعنى سارح مهووس فنغامو.
هذا يعشق لگناوي ولحن السنتير.
ولعبدات الرمى لاخر يسمع لكلام الزين.
لحلاقي عامرين بالزوار والسامعين.
زينة لمدون مراكش يا بلادي.
وارثة لفراجة على ابا وجدادي.
ومول النية فيها ما يتخص ولا يتيه.
مدينتي بلاد النشاط والربح والتيسير.
كتسلب لعقلول ولي زارها كيحير.
-بقلم: محمد دومو
-المغرب
ليست هناك تعليقات:
إرسال تعليق