(( قطار العمر ))
راحوا الحبايب
في ناس كتير
رحلوا يا ناس عننا
منهم اللي عاش وسطنا
ومنهم اللي كان ساكن جنبنا
منهم الأخ والاخت
والصاحب والصديق
واللي كنا نقوله يا عمنا
منهم اهل الحته الطيبين
وأهل الحاره اللي ف حيَّنَا
منهم جوز الأخت فلان
وجوز الاخت فلان
وزوج الأخت الفلان
وأخويا الكبير
اللي رحل عننا
من سنين
ورحيلوا وجع قلبنا
ومنهم اخويا الصُّغَيَّر
اللي سافر من كام سنه
ومن ساعتها
مادقتش طعم الهنا
والله اعلم
هشوفوا تاني
قبل ما اموت انا
حتىٰ الصحاب
منهم اللي عاش معانا العمر
ومنهم اللي مر علينا
وماشفتوش من كام سنه
حتىٰ اخواتي الكُبار
بشوفهم كل كام شهر
ومنهم اللي بشوفوا
من السنه للسنه
كله تايه بدنيا
نستنا طعم الهنا
واخر كلام
#أمي
اللي رحلت
من كام كام كام سنه
أصلها رحلت
من وسطنا
وكلنا كنا صُغَيَّرين
رحلت وبرحيلها
رحل معاها فَرّحِنَا
حتىٰ #الأب
رحل من كام سنه
وكنت اتمنىٰ كل المُنَىٰ
إنه يعيش
ميت مليون سنه
عارف هتقولوا مجنون
مين هيعيش
ميت مليوووووووون سنه
اصل الأب ده سند
طبعاً من بعد ربنا
اظن كفايه كده
اصل الواحد
لو افتكر
كل اللي مروا عليه
هنقعد نقول فالقصيده
ويمكن تخلص السنه
وانا وانتوا
لسه قاعدين هنا
كبرنا
وعمرنا اتنحل
من الأيام والسنين
وقلوبنا مليانه
بالشوق والحنين
لأيام جميله
ضاعت مننا
وسابتنا ننكوي
بنار المشتاقين
وآه علينا
وبقينا مساكين
اعذروني يا ناس
اخر كلام عندي هقولوا
اصلهم يا ناس
كلهم رحلوا عننا
انت يا عم وانتِ يا عَمَّه
وانت يا خال وانتِ يا خاله
ابقوا سَلّمُولي
علىٰ جدنا
ابقوا سَلّمُولي
علىٰ جدنا
ابقوا سَلّمُولي
علىٰ جدنا
الفيلســــوف العاشــــق
حســـــن هاشــــــم
26 ديسمبر 2021
ليست هناك تعليقات:
إرسال تعليق