٠٠ { شمسية وكرسين }٠٠
أتاري البحر مش ملهم
لكل الناس
يشيل ويحط على شطه
كتير أجناس
وأتاري الشط شمسية
وترابيزة وكرسيين
وبطيخة ومعاها جبنة فلاحي
وفطيرتين
وكم عيل بيتمايع
قصاد كم بنت أمورة
وواد شاري وواد بايع
وواد منساش ياخد صورة
ودى واحدة بجلابية
خايفة الموج يعريها
ودى واحدة ببكيني
خايفة الموج يغطيها
وصفارة وأفصايد
لصالح فرقة المواكيس
وتتشاط الكورة ف الحلة
وتلبس وش عم خميس
وطيارة بالونها بتتمايل
وراكبة الريح
وواد طيار
ببكرة خيط
يجوب الفضاء
بدون تصاريح
وغزل بنات وزمارة
تنادي ع الأطفال
وكوتشينة ونظارة
وطين صلصال
وست الحسن يافريسكا
بجوز جنيهات
واللب السوري والأسمر
والطوفي أبو فيونكات
وواد يمشي علي ايده
كأنه ف سيرك
وترابيزة عليها فراخ
تنط القطة تخطف ورك
وأنا والبحر علي موعد
بس البحر مش فاضي
وأنا شايف كل أحواله
ولكن عنها مش راضي
وأقول يابحر حارجعلك
تكون رايق
وأوعاك يابحر تكون
م الخلق متضايق
أصلك يابحر مش ملهم
لكل الناس
موجك يابحر يشيل ويحط
ويحضن ولا يتباس
٠٠٠٠٠٠٠٠٠٠٠٠٠٠
ابراهيم علي
ليست هناك تعليقات:
إرسال تعليق