ما تسأليش...
وجعي سر ما يتحكيش
نار جوه قلبي ما بتنطفيش
سهم جارح
جرحه رافض يسيبني أعيش
فمتسأليش
سامع صوت السواقي
بيقول غناوي
و من بعيد
سامع الناي و الحكاوي
كم جرح عدى و مر
و قلوبنا شاربة المُر ؟
كم حلم حلمنا بيه
و عيشنا ندور عليه ؟
فاكر طلتك وسط الغيطان
و لون عيونك شارب خضار
رسمت ليكي وسط الزروع
فدان فرح فستانه طرح
شوية بدور
حلمت بيكي بتغزلي
من الشمس طوق
حبة لولي و حبة نور
زينت بيكي جنتي
و الحنة في ايديكي بخور
حلمت و الحلم في زمانّا حرام
هو أنت فاكر نفسك من الكرام
أنت أخرك في المنام
تحلم بموتة تكون تمام
و الوجع دا من نصيبك
صونه وأرمي عليه سلام
و ما تشتكيش
أصل الوجع ما بيتحكيش
فما تسأليش.....
تهاني بركات ١ / ٢ / ٢٠٢١
ليست هناك تعليقات:
إرسال تعليق