جلنار/ بقلم الشاعر وليد ايوب

جِلنار
شعر_ وليد أيوب
لمّا شفت جلنار
يا ناس شُو صارْ لي
ما ادْري شُو صارْ لي الْيومْ
لَمَّا شُفِتْ جِلْنارْ
عَ الْعينْ بِتْمَلِّي
تْمَلِّيتْ بِالْخِلْقَهْ
مِنْ ساسْها لَلَّراسْ
وِبِكَسِمْها الْمَيَّاسْ
وِالْمِرْيَلِهْ الزَّرْقا
وِالْعينْ.. وِالصَّدِرْ يَللِّي
تْمَنَّيتْ يا رَبِّي
عَلى جَمالو هِيكْ
كُلِّ الْعُمُرْ يِبْقى
وِرْكَضْتْ صوبِ الْبيتْ
قُلْتِلُّو يا بَيِّي
بِيعِ الْكَبِشْ لِصْبَحْ
وِالْجَحْشْ وِالسَّخْلِهْ
وْفَحِلْنا لِمْلَحْ
وِالدِّسْتْ وِالدَّلِّهْ
بيعِ الْحَلالْ كُلُّهْ
وِالْعَفِشْ لا تْخَلِّي
وْبيعِ الْكَرِمْ لِبْعيدْ
وِالْجَبَلْ وِالسَّهْلِهْ
دَخْلَكْ يا بَيِّي بْحِسّْ
لَمَّا شُفِتْ جِلْنارْ
ضِحْكَتِ بْوابِ الدَّارْ
وِالزَّنْبَقَهْ الْحَمْرا
وْشُبَّاكْنا الْقِبْلي
وِرْكَضْتْ لَبيتا
جايِبْ مَعي شي زْهارْ
وْيا نْسونْ بِالقُلِّهْ
وْليِرْتينْ بِالزِّنَّارْ
وْبَقْلاوَهْ تَنْحَلِّي
يا ناسْ حَبِّيتا
لكِنْ أَبوها قالْ
صارِ الْمَهِرْ قِنْطارْ
وِالدَّفِعْ عُصْمَلِّي
بقلم: الشاعر وليد ايوب