حقيقة
قلبى إللى حبك كان برئ
وكان معاك أهل وصديق
ليه غبت عنه وقلت له
فات الزمن ما انتش جرئ
حملته ليه ضعفك كتير
وف كل مرة كنت أغير
كنت بتفرح بالقوى
عاوز تكون شهريار
قلبك دا بيت ماله قرار
يتجمع العشاق هناك
عامله محطة انتظار
اليوم دا كان ليا أنا
وتاليه يكون للسوسنة
فكرك دا إيه راح يتحسب
عايش فى جنة م السما
لأ ربما آخرتها نار
و دعيت عليك رب الديار
ورفعت ايدى وقلت له
ياذا الجلال يا منشئ الريح والجبال
أنا عندى حق وباشتكى
الظلم دا آخره المرار
وباعيد وأزيد وأرفع شعار
رب العباد له حكمته
وف قدره إنى أعرفك
وترك لى أنا حق الخيار
الذنب كان عندى أنا
من كام سنة
عشت انبهار
والكلمة كات تسحر قلوب
وقلوب تدوب وتتكسر
ومفيش قرار
وفهمت أنا إنك أكيد
نازع لقلبك رقته
حاطط مكانه كاس وبار
وإنك صحيح
خالى من الحب الصريح
عايش تجسد الجريح
ولا لكش ف الصدق اعتبار
# بتول العتربى
ليست هناك تعليقات:
إرسال تعليق