رثاء شهيدة لقمة العيش للشاعرة آية الشرقاوي..... عروسة النيل
يا واجعة القلب وشَقَّاه
يا روح بريئة صاعده لسماه
يا لقمة عيش مٌرَّة ألف مرة في رحمة الله
يا لقمة عيش حاف وعليكِ الزمن حاف آه
آه وألف آه يا عروسة النيل ليه سكناه
عشرين جنيه وخمسة أجرتك يااااااه
قيمتك خَمَسْ سجاير لإبن العز والجاه
شروق ياشمس غابت وسابت للغني دنياه
سابت رسالة للغني فيه ألف شروق منسية
فيه غيري وغيري عايشين ع اليوميه
م العربية للمعدية عايزين يلحقوا اليوميه
عايزين لقمة حاف وشربة ميه
عايزين هِدّْمَه تستر حامدين رب البريه
جوعوا ياولاد الغلابة وبلاش اليوميه
الموت مستني ركوب المعديه
بلاش تاكلوا بلاش تشربوا بلاها يوميه
ياشايط الكوره بالملايين
يامطربين يافنانين
مالكو حق الغلابه فين
آااااااه نسيت كمان الرقاصين والطبالين والإعلاميين
وشلة الفاسدين ورجال الدين وأصحاب الملايين
كلتو إيه وبتاكلو فين
كلتو الغلابه وبشغل الديابه مرسومين
ذنب شروق وغيرها مطوق رقابكم ليوم الدين
شروق يا واجعة القلب وشَقَّاه
شروق يارايحة للحق ف علاه
شروق يا شاكية الخلق للي خلقه وعطاه
ألف رحمه ونور عليكِ
يابنت الوجع والآه
يا واجعة القلب وشَقَّاه
ليست هناك تعليقات:
إرسال تعليق