الساقيه
٠٠٠٠٠٠٠٠٠٠٠
قطر الحياه بينا تاه
و المطر والعطش جواه
ونبض القلوب الدايبه
بتنده ع الأمل وبتتمناه
وانا اكتب عن الحب ازاي
ومن دق القلوب بيصرخ الناي
عند الساقيه الشايبه
تحت النجمه الغايبه
صرخه من الدقه جايبه
كلام وحواديت والالام
و تكشيرة الزمن والايام
وأرواح تايهه ف السكه
ونفوس بريئه وخايبه
ونفوس جريئه وخاينه
بتسخر من حنيني وغناي
وانا اكتب عن الحب ازاي
ف الدنيا بنت الفانيه
الفقير فيهامكسور ضهروا
واكتب عن الحب ازاي
واللي ساجن نور لياليها
ساكن النجوم والقمر صهروا
وغالي علي الدنيا غالي
ابكي من الظلم يا موالي
والفقير مكسور ضهروا
وسوء الحظ بينده له
وجايه عليه الدنيا جايه
عند الساقيه عند الساقيه
الكل غايب قمروا
الكل خايف من قدروا
الكل شايف ف سهروا
ايام غريبه حزينه مداريه
عند الساقيه عند الساقيه
اكتب عن الحب ازاي ياقطر
والوجع والحرمان مالي السطر
اكتب عن الحب ازاي ياقطر
وطموح الاندال ف الطمع والغدر
اكتب عن الحب ازاي ياقطر
وعيون الحكام ناسيه العدل
ياقطر الحياه الفرح غايب
يا الف اه ملناش حبايب
غير هيه وقاسيه هيه
عند الساقيه عند الساقيه
الساقيه
بقلم على عبدالرحيم محمد
ليست هناك تعليقات:
إرسال تعليق