( صورة ) شعر محكي
كلمة عجيبة بتمرق ببالي
معها سؤال معشعش من زمان
الكلمة قديمة كتير منقالة/ي
أنّو حياتك حلم يا إنسان
أجيال مرّت عاشت الحالة/ي
وما أدركت كنه الحلم شو كان
فينا الحياة بعزم شغّالة/ي
ومافي حدا أسرارها فهمان
منولد وسفر عقولنا خالي
وبيصير مع سير العمر مليان
وبالرغم من وصف الجسم آلة/ي
وبالرغم من وصف الوعي ميزان
بتبقى الحياة بجوهرا العالي
صورة غريبة ما ألا عنوان
لنّو طيوف الموت جوّالة/ي
وحكم النهاية محاصر الأكوان
عا قدّ ما يتفلسف خيالي
ويصنع رؤى تا يبتدع تبيان
ويرسم عا هامات العلم هالة/ي
بتضلّ غصّة جهل بالوجدان
جسمك بمنظور العلم بالة/ي
والروح سحبة خيط من دخّان
والعمر نغمة وتر رحّالة/ي
وموجة صدى غابت عن الآذان
من هون صفّا الفارق قبالي
مابين رأي العلم والإيمان
الإيمان خبرة نور سيّالة/ي
كل جيل عم يتناقلا لا جيل
بدء الحياة وأخرا الرحمن
شعر: بسام الأسبر 2/12/2021
ليست هناك تعليقات:
إرسال تعليق